Илсаф Нуриев: "Конкурста сынау узганда ялан кул кычыткан йолкыдым" (фото)

Анда белем алу хәрби хезмәттә булу белән бер дәрәҗәдә. Зур әзерлекләр, чыныгулар, күп ихтыяр көче таләп итә. Гади генә бер авыл малае өчен яңалыклар да, каршылыклар да җитәрлектер шул биредә... Тик шулай да, Илсаф сынатмый. Кечкенәдән үк хыялын чынга ашыру өчен ул үз өстендә нык эшли, спорт белән шөгыльләнүе, бигрәк тә көрәшне үз итүе аңа ярдәм итә. Мәктәптә дә яхшы укыган, хәрби чараларда да актив катнаша торган була.

Илсаф Нуриев - Рязаньдагы әлеге хәрби уку йортында белем алу бәхетенә ирешкән, үз тырышлыгы белән укырга керә алган районыбыздан бердәнбер егет. Әле алай гына да түгел, хәзерге көндә Татарстаннан анда, нибары 5 кенә егет укый икән. Илсаф Нуриев училищеда 6 ай белем алгач, шушы көннәрдә туган авылы Көшкәтбашка кайтып, гаиләсе янында ялда булды. Аның ялга кайтуы турында ишеткәч, берничә сорау белән мөрәҗәгать итәргә булдым:

- ВДВ - бу минем балачак хыялым. Десантниклар турындагы фильмнарны яратып карадым, алар турында кызыксынып укый идем. Парашюттан сикерәсе килү теләге дә көчле булгандыр... Иптәшләремнән аермалы буларак, киләчәктә үземне хәрби кеше итеп күрергә теләдем, шуңа да нәкъ менә хәрби уку йортын сайладым да инде. Кечкенәдән погонлы киемнән йөрүчеләргә, хәтта милициянерларга (ул чакта шулай йөртелә иде әле) кызыгып карый идем. Бу минем өчен ул вакытта зур бер хыял иде. Үскәч "военный" булам дип, үз-үземә сүз биргәнем әле дә истә.

- Әйе. Миңа райондагы военкоматта да, Татвоенкоматта да , "Энем, йөрмә дә, син анда барыбер керә алмыйсың", диделәр. Менә шул сүзләргә җавап итеп, мин барыбер укырга керәм, дип көчле үҗәтлек белән тырыша башладым. Беркем дә ышанмады, бары тик бертуган абыем Илнур гына мине чын күңеленнән аңлады, чөнки кеше ышанмаганда да, ул ышана иде. Минем күп кенә җиңүләремдә абыемның өлеше зур. Аңа рәхмәтлемен. Ул булганда башка мотиваторлар кирәкми дә. Ул рухландырганнан соң, жиңелергә мөмкин түгел уже...

- Рязаньдагы бу училищега бик күп төбәкләрдән киләләр. Барлыгы 20 мең чамасы егет булганбыздыр. Конкурстан бары тик 600ләп кенә кеше калды. Бер урынга 12 кеше иде. Мин 122нче булып кабул ителдем. Монда конкурсны үтәр өчен бик зур физик әзерлек кирәк. Таләпләр катгый, биремнәр берсенән-берсе авыр. Көчне, җитезлекне, тапкырлыкны да тикшерәләр. Кимчелек, җитешсезлек тапсалар, шунда ук "Юк! Үтмәдең!" дип кайтарып җибәрәләр. Ә иң истә калганымы, ул - ялан кул белән кычыткан йолку булды. Түздем, чыдадым инде...

- Училищеда 3 ел укырга кирәк. Аннан соң өстәмә 7 ел контракт төзеп калырга мөмкин. Әйе, стипендия түләнә, ай саен 2 мең сум счетка күчеп бара. Уку җиңел түгел инде, әлбәттә. Авыр булса да, миңа бик ошый. Анда укыр өчен бик нык чыныккан һәм мөстәкыйль булу кирәк. Мин мәктәптә укыганда Норма мәктәбе базасында оештырылган "Аэроплан" түгәрәгенә йөрдем. Анда күп кенә нәрсәләргә төшендем. Беренче тапкыр Коркачыкта парашюттан сикердем. Инде барлыгы җиде мәртәбә парашюттан сикергәнем бар.

- Шатланучылар да, "Ник бу юлны сайладың, үзеңә авыр була бит", дип әйтүчеләр дә булды. Якыннарым хәрби училищеда укуымны хуплый. Әле менә ялга кайткач үзем белем алган Түнтәр мәктәбендә очрашуда булдым. Укыткан укытучыларым, укучылар белән күреп сөйләштем. Аларның сорауларына җавап бирдем. Истәлеккә фотоларга төштек, очрашу бик күңелле булды. Санаулы вакыт тиз үтә, инде менә тагын китәргә кирәк.

27 гыйнварда, изге җомга көнендә Илсаф Нуриев кабат юлга кузгалды. Хәерле юллар, уңышлар сиңа, Илсаф! Ватанны саклардай шундый ул үстергән Гүзәлия һәм Илфат Нуриевларга рәхмәт инде.

Әңгәмәдәш - Ясминә Шәмсетдинова.