Кабан күле буе Ага Хан премиясендә җиңүгә дәгъва кыла алачак

(Казан, 6 сентябрь, «Татар-информ», Диана Авакян). Кабан күле буен төзекләндерү проектының киләсе циклларда архитектура өлкәсендә Ага Хан премиясендә җиңүгә дәгъва кылу өчен бөтен мөмкинлекләре дә бар. Премия директоры Фәррух Дерахшани «Татар-информ» агентлыгына шулай дип белдерде.

«Кабан күле буен төзекләндерү проекты бик тә кызыклы. Анда суны чистарту, яр буенда үсемлекләр, чәчәкләр утырту эше башланды. Бу бик тә мөһим момент, табигать әлеге урында чыннан да яңарыш кичерә башлады дигән сүз», - дип искәртте ул.

2019 елда 2012 елның 1 гыйнварыннан 2017 елның 31 декабренә кадәр гамәлгә ашырылган һәм җәмәгать куллануында бер елдан да ким булмаган проектлар Ага Хан премиясен дәгъвалау бәйгесендә катнашу өчен сайлап алынды. Әлеге критерий буенча Кабан күле буен төзекләндерү проектын конкурста катнаштырмадылар.

Шунысын да искәртик: Татарстан Республикасы Иҗтимагый киңлекләрне үстерү программасы премия лауреатларыннан (алар барлыгы - 6) берсе булды.

Архитектура өлкәсендәге премия Ага Хан тарафыннан 1977 елда гамәлгә куелган. Ул архитектура өлкәсендәге зур казанышлар өчен тапшырыла.

Фото: Рамиль Гали/архив, Салават Камалетдинов