"Каенкай"ның балалары булачак чемпионнар (+фото)

Уртанчылар һәм зурлар төркеменә йөрүче балаларыбыз әле генә әтиләренә үзенчәлекле бәйрәм чарасы күрсәтсә, инде менә әниләрнең дә чираты килеп җитте. Кыз һәм улларыбызның чын күңелдән сөйләнгән шигырьләре, матур җырлары, дәртле биюләре көчле алкышларга күмелде. Күзләребездән яшьләр китмәде, ә ахырдан, әнием, бәйрәм белән, мин сине яратам дип сабыйларыбызның килеп кочаклап, бүләк тапшырулары дөньядагы барлык байлыкларны да алыштырыр иде, мөгаен.

Елның-елында, бәйрәмнән-бәйрәмгә күңел ашкынып бара бакчага, биредәге җылы мөнәсәбәт, балалар белән бик көчле эшләү һәм шуны әти-әниләргә күрсәтү олуг мактауга һәм зур хөрмәткә лаек. Бу юлы олимпиада да, йөрәкләр тапшыру да, диңгездә йөзү дә булды һәм җанга үтеп керердәй һәрбер музыкаль номер икенче бәйрәмгә кадәр йөрәкләребездә сакланачак. Рәхмәт сезгә, кадерле тәрбиячеләребез!