Каенлык шугалагы гел балалар тавышыннан гөрләп торсын!

Кыш безгә бик күп күңелле бәйрәмнәр бүләк итә. Кышкы ялны яратучылар өчен ике ел элек тагын бер яңа бәйрәм барлыкка килде – ул Бөтендөнья кар көне. Әлеге уңайдан “Факел” яшүсмерләр клубы хезмәткәрләре Каенлык урамында урнашкан шугалакта бик шәп бәйрәм үткәрделәр. Чарага килүчеләр төрледән-төрле бәйгеләрдә катнашып, бүләкләр ота алдылар. Җиңү яулау теләге катнашучыларда шуның кадәр көчле булды ки, алар хәтта тирә-яктагы бер әйбергә дә игътибар итми мәш килделәр. Һәм финиш сызыгын беренче булып кисеп керү өчен барлык көчләрен бирделәр.