Кайтаваз «Алай түгел, болай ул»

– Безнең җирлектә 4 зират бар, – ди җирлек башлыгы. – Һәрберсе дә карауда тора дип әйтә алам. Зиратта өмә оештырылыр алдыннан белдерүләр эленә, халыкка хәбәр ителә. Килгәне килә, килмәгәне юк, мәҗбүр итеп булмый, һәркемнең намус эше. Түнтәр зираты буенча көзен шалтыраттым, әйдә, җыештырыгыз, техника да куйдыртам, дидем. Язга калдырыйк, диделәр. Калды менә, язга... Бу авыл белән ел да шушындый хәл, аңлашып, берләшеп бетә алмыйлар. Килмәгән кешене мәҗбүри китертеп булмый. Мин җирлектә беркемне дә аермыйм, һәркемгә дә карашым тигез, удмурт авылларында зират чистартырга җыенсалар, шалтыраталар, киңәшләшәләр, бердәм рәвештә зиратларны чистартып та куялар. Зират ул – изге йорт, анда барып эшләү изге эш һәм моны һәркем күңеле белән аңларга бурычлы, зират мәсьәләсендә тавышланып йөрү килешми.