Кәбестәнең бу төрен рационга кертегез!

Брокколи кәбестәсен күп итеп туңдырып куйган идегезме? Ул витаминнарын туңдырган очракта да саклап кала. Белгечләр әйтүенчә, кәбестәнең бу төре - ашказаны һәм күкрәк яман шеше булдырмас өчен файдалы яшелчә. Аны атнасына өч тапкыр булса да ашарга кирәк.

Брокколидан төрле ашлар әзерләргә мөмкин. Мәсәлән, бу бик файдалы яшелчәдән тиз генә аш пешереп алырга да була. Кайнап чыккан суга туңдырылган брокколи кисәкләрен, туралган бәрәңге салып, 10-15 минут пешереп алабыз. Шул арада кызган табага үсемлек мае салып, икмәк кисәкләре кыздырабыз. Кайнар икмәк кисәкләренә тоз, борыч, угычтан чыгарылган сарымсак сибеп куйсаң, тагын да тәмлерәк була.

Хәзер бераз суына башлаган яшелчәләрне блендер аша үткәреп, пюре ясыйбыз да, шуңа бер стакан куе сөт өстәп, янә кайнар утка куябыз. Бу юлы кайнатып чыгарырга кирәкми. Ашка яшел тәмләткечләр кушып, тәлинкәләргә бүләбез һәм, тәмле икмәкләрне салып, табынга чыгарабыз, дип яза Кызыл таң.

Ашыгыз тәмле булсын!

Фото: pixabay.com/ru

Автор: Зөлфия Фәтхетдинова