Күпфатирлы йотрларда ремонт өчен җыелган акчалар нәрсәгә тотыла?

- Күпфатирлы йортларда яшәүчеләрдән коммуналь түләүләрдән тыш, өстәмә рәвештә ремонт һәм торак мәйданнарны тоту өчен биш юнәлеш буенча акча җыела. Тариф буенча торак фонды белән идарә итү өчен - 2,50, йорт яны территориясен җыештырган өчен - 1,72, торак биналарга агымдагы ремонт һәм йорт яны территориясен төзекләндерү өчен - 2,25, суүткәргечләр-канализация торбаларын ремонтлау һәм техник хезмәт күрсәтү өчен - 1,90, йорт эчендәге җылыту системасын ремонтлау һәм техник хезмәт күрсәтү өчен фатирның бер квадрат метрына 1,21 сум исәбеннән билгеләнгән.

- Бу акчаларга нинди эшләр башкарыла?
- Әлеге акчаларга подъезд тәртипкә китерелә, тышкы төзекләндерү эшләре: бозылган тротуарларны, коймаларны һәм спорт җайланмаларын, хуҗалык мәйданнарын, ял итү урыннарын тәртипләү кебек эшләр башкарыла.

- Кайсы йортта ремонт ясаласы ничек хәл ителә?
- Без халык тарафыннан йорт өчен җаваплы итеп сайланган кеше һәм биредә яшәүчеләр белән очрашулар үткәреп, беренче чиратта кайсы йортка ремонт кирәклеген ачыклыйбыз.

- Һәр йорттан җыелган акча шул йортның үз мәнфәгатьләре өчен генә тотыламы?
- Бездә күпфатирлы йортларда фатирларның мәйданнары аз күләмдә булу сәбәпле, шул йорттан җыелган акча гына аны ремонтларга җитми. Шуңа да акча гомуми фондка җыела. Җитмәсә тариф буенча тиешле сумманы түләмәүчеләр дә гомуми эшкә аяк чалалар.

- Түләмәүчеләр шулай күпмени?
- Бүгенге көндә миллион сумнан артык әҗәт җыелды. Аларның эше судта. Менә шундый намуссыз кешеләр аркасында фондка акча аз җыела, димәк, ремонт та аз була. Әлеге йортларда яшәүчеләр шуны аңлап, тариф буенча тиешле суммаларны вакытында түләп барсыннар иде.

- Әңгәмәгез өчен рәхмәт. Әңгәмәдәш - Гөлзидә Газизуллина