Кыяр орлыгы бер төндә шытып чыксын өчен нишләргә?

Кыяр орлыгын туфракка утыртсаң, һава торышы уңайсыз булса, ул берничә көн тишелми ята. Салкыннар башланса, орлыклар туңарга да мөмкин. Кыяр орлыгын кәгазь тастымалга куеп, бер төндә шыттырып чыгарырга була. Бу турыда киңәшләр сайтында язылган.

Болай итеп утырткан кыяр уңышлы да була, июльдә үк кыярлары да үсә.

Гади пластик контейнер төбенә ике катлап кәгазь тастымал куярга кирәк. Кәгазьне җылы су белән чылатырга һәм орлыкларны матурлап тезеп куярга. Орлыкларга да пульверизатор ярдәмендә җылы су сиптерергә.

Контейнерны җылы урынга куеп, төнгә калдырырга. Төн эчендә беренче шытымнар чыгар, дип ышандыралар киңәш язучылар.

Аннары кыяр үсентеләрен туфракка күчереп утыртырга кирәк. Урамда җылы булмаса, тәрәзә төбендә үсенте итеп үстерә торырга була, диелә хәбәрдә.

Чыганак: Интертат ; фото: «Татар-информ» / Рамил Гали