Магнитогорскида газ шартлаган йортта һәлак булучыларны җирли башладылар

(Казан, «Татар-информ»). Магнитогорскида торак йортның бер подъезды җимерелеп төшү нәтиҗәсендә һәлак булган кешеләр белән хушлашалар. Бу хакта «Интерфакс» агентлыгы Магнитогорск шәһәре хакимияте матбугат хезмәтенә сылтама ясап хәбәр итә.

Хушлашу мәрасимендә йөзгә якын кеше катнаша. Чиләбе өлкәсе губернаторы матбугат хезмәте мәгълүматы буенча, туганнары һәм якыннары әлеге фаҗигадә һәлак булган ир белән хатын һәм аларның яшь ярымлык кызы белән хушлаша. Чарага Чиләбе өлкәсе губернаторы Борис Дубровский да килгән.

Кичә – алты, бүген – тугыз, 7 гыйнварда бер кешене җирләячәкләр, диелгән әлеге хәбәрдә.

Фото: ТИ

Магнитогорскида 31 декабрь иртәсендә газ шартлау нәтиҗәсендә Карл Маркс проспектындагы 12 подъездлы 10 катлы панель йортның бер подъезды тулысынча җимерелеп төшкән. 39 кеше һәлак булган. Биш кешене хастаханәгә озатканнар, аларның хәле тотрыклы.

3нче гыйнвар көнне Гадәттән тыш хәлләр министрлыгы эзләү-коткару операциясенең төгәлләнүе хакында хәбәр итте.