Мәгъфүр абыйга матур мизгелләр бүләк иткәннәр. Кемнәр? (+фото)

Балтачта яшәүче хезмәт ветераны Мәгъфүр Маннаповны бистәдә белмәгән кеше юктыр.Гармун остасы, тормыш-көнкүрештә кирәкле әйберләрне ремонтлаучы, биш вакыт намазда булган Мәгъфүр абый очрашканда олысы белән дә, кечесе белән дә елмаеп исәнләшер, хәлеңне сорар һәм хәерле юл, имин көннәр теләр.

Үзе ягымлы, ипле, мәрхәмәтле булганга күрә башкалар да аны тирән хөрмәт итә. Туган көне уңаеннан, почта бүлеге кызлары үзен чәчәк бәйләме белән куандырган. Аздан гына хәтер кала, аздан гына күңел була, диләр. Кечкенә генә, әмма ихластан бирелгән чәчәкләргә Мәгъфүр абыйның куанганын күрсәгез икән. Матур мизгелләр бүләк иткәнегез өчен рәхмәт сезгә кызлар! Мәгъфүр абыйга без дә үз чиратыбызда  исәнлек, якты тормыш, камил акыл, рух күтәренкелеге телибез!