“Новинка” тормыш өчен ни кирәк?!

Әлеге язманы укыгачтын, эшмәкәрләр арасында, безнең хәлне дә аңларлар икән, дигән кайтавазлар булмады түгел. Чыннан да, терәк булырлык кешесе, арттан этүчесе булмаган иптәшләр эшмәкәрлектә ничек уңыш казанган соң әле? "Новинка" көнкүреш товарлары кибете хуҗасы Марат Шәмсиевны гына алыйк.

Сөбханалла, күз тимәсен, бүгенге көндә Маратның эше уңышлы бара. Район халкын ишек-тәрәзәләр белән тәэмин итә, кибетендә йорт төзелешенә кирәкле бөтен төр товар да бар, елның теләсә-кайсы вакытында бакча эшләрен башкару өчен кирәкле инструментны алып кайтырга тырышалар, кыскасы, «Тормыш өчен ни кирәк, "Новинка"га кил тизрәк!» дип әйтәсе килә әлеге кибеткә кергәчтен. Кибетнең бистәдә, үзәк юл өстендә булуы да уңайлы. Биредә эшчәнлеген башлаганда Марат Ришатович машина тукталышы да булдырасы иде, мәчеткә килүчеләргә машина куярга мөмкинлек булыр иде, дигән иде. Эшләде ул аны, хәзер иман йортына килүчеләр дә рәхмәтләр укып, әлеге тукталыштан файдалана.

Комзавод авылы егете буларак, туып-үскән авылына да игелекле ул, авыл бәйрәмнәре үткәрә калсалар да ярдәм итәргә тырыша, күп кенә ул як авылларның мәчет төзелешләренә дә игелек кылуын беләм.

Марат борынгы сәүдәгәрләр нәселеннән, әби-бабасы ягыннан Шәмсинекеләр дә, Вәли бай да гаять тә таза тормышлы кешеләр була, кәсепчелек белән шөгыльләнәләр, сәүдәгәрлек итәләр. Кулак дип сөргенгә сөрүләре белән генә атлары югала. Маратның да армиядән кайткач төпләнеп эшләмәвен туганнары начарга юрамады, аңарда безнең бабайлар каны, үз юлын тапсын, диделәр. Тапты Марат үз юлын, әмма ул юлын тапканчы аңарга бик нык тырышырга, тормыш сабаклары алырга, күп мәртәбәләр язмыш сынауларына бирешергә, гаделсезлекләр белән күзгә-күз очрашырга, дус-ишләрдән сыналырга туры килде. Әз-мәз суммага ишекләр куеп йөреп, шул суммага нәни сабыен кочаклап утырган хатынын да кайгыртырга үзендә көч тапты. Әле ярый Айгөле гаилә җанлы, акыллы, ирен хөрмәт итүче тормыш иптәше булып чыкты. Ярык тагарак янында калган, ялганга ышанып күп кенә мөмкинлекләрне кулдан ычкындырган чаклары күп булды гаиләнең. Ләкин вакыт дигәннәре барысын да үз урынына куйды, бистәнең бер кибетендә арендага урын алып, әкренләп үз эшләрен башлап җибәрделәр, ишекләр алып кайтып сата башладылар, антенналар урнаштырып йөрүне дә башлап Марат үзе башкарды. Үзәк мәчет каршында йорт сатып алып, шунда кибет тә салып куйдылар. Һәм менә бүгенге көндә хезмәткәрләрен эшле итеп, район халкына игелекле хезмәт итеп яткан көннәре. Инде балалары - ике кызы, бер улы да үсеп килә.

Шәхсән үзебез тауарларны "Новинка" кибетеннән алырга тырышабыз, танышлар, якыннар да бирегә килә. Әлегә кадәр бер генә товарыннан да зыян күргән юк.

- Без җитештерүче түгел, товарны сатучы гына. Менә шуны дөрес аңлаган кулланучылар белән эшләргә дә җайлы, - ди Марат Ришатович. Рәсәйнең төрле өлкәләренә, бик еш Мәскәүгә күргәзмәләргә йөрүләр эшләрен камилләштерергә ярдәм итә. Көн-төн йокы күрмәсә-күрми, кулланучы теләгән товарны әллә-кайлардан эзләп табып, алып кайтып бирә.

Кем белә, бәлки әле киләчәктә тәрәзә-ишекләр ясаучы мини-завод та эшләп, район халкына эш урыннары да булдырып куярлар. Борынгы бабалары сәүдәгәрлек белән генә чикләнмәгән, заводлар да тоткан бит...