Нурзада киленнәре 

Авылларда тотрыклы нигезгә корылган гаиләләр әлеге җирлекнең йөз аклыгы булып тора. Куныр авылында яшәүче Закировлар гаиләсе дә башкалар өчен  үрнәк. 
Закировлар ил-көннәргә берсеннән-берсе игелекле өч ул, ике кыз бүләк итә. Кечкенәдән тырыш хезмәт белән көн күреп, балаларын да үз үрнәкләрендә тәрбияләгән алар. Өлкәннәр күптән инде бакыйлыкта булса да, нәсел дәвамчыларының матур, тигез тормыш алып баруларына рухлары шаттыр. Төп нигезне гөрләтеп яшәүче Рифат белән Гөлшат, яңа йорт җиткереп башка чыккан Нургаяз белән Резида, Раиф белән Раиләнең, кияүгә чыгып үз куышларын булдырган Сәрия белән Әлфияләрнең тормышлары куанып туймаслык. 
Бүгенге язмам Закировлар нигезенә килен булып төшкән Гөлшат, Резида, Раилә хакында. Килен кайнана туфрагыннан яратылган, диләр. Киленнәре Наилә апаның үзе кебек ир-хакын хаклап, нигез җылысын һәм н гаилә традицияләрен саклап яшиләр. Алар кунакчыл хуҗабикә дә, үрнәк хатын, кадерле әни дә. Шунысы игътибарга лаек, Закировларда кызга-киленгә бүленеш юк, барысы да үзләренеке. Тагын шунысы да бар, Гөлшат һәм Резида апа кебек Закировларның төпчекләре Әлфия дә укытучы булып эшли. Сәрия апаның эшен исә төпчек килен Раилә дәвам итә. Ул Куныр урта мәктәбендә хуҗалык эшләре буенча мөдир. 
Гөлшат һәм Резида апалар икесе дә балалар күңелендә телгә мәхәббәт тәрбиялиләр. Гөлшат апа татар теле һәм әдәбияты укытучысы. Без мәктәптә укыган елларда ул башлангыч сыйныфларда укыта иде. Төгәллеге белән аерылып, оештыру сәләте көчле булганлыктан, 2005 елдан аны укыту-тәрбия эшләре буенча директор урынбасары итеп куйдылар. Әниләргә хас йомшаклыгы, кирәк урында дөрес итеп шелтәләве белем үрләрен яулаганда һәркем өчен канат куя дисәм һич арттыру булмас. Камилекнең чиге юк, ди халык мәкале. Гөлшат апа да укучыларын әлеге рухта тәрбияли. Төп нигезне балкытып яшәүче мөгаллимә тормыш иптәше Рифат абый белән өч кызга якты дөнья бүләк итеп, бүген аларның кадер-хөрмәтендә яшиләр. Рамиләсенең бүген үз гаиләсе, Гүзәле Казанда белем ала, Гүзәлә псевдонимы белән әдәбият дөньясында үз эзен булдыручы яшь шагыйрә, төпчекләре Әдилә Куныр урта мәктәбендә укый. 
Резида апа исә күрше Арча районы кызы. Югары белем алганнан соң юллама белән безнең якларга эшкә кайта һәм шул кайтуыннан Кунырның үз кешесенә әйләнә. Рус теленә һәм әдәбиятына мәхәббәт тәрбияләүче мөгаллимәне укучылар да, хезмәттәшләре дә, авылдашлары да төгәл, максатчан булуы өчен хөрмәт итә. Аның укучылары арасында олимпиада җиңүчеләре дә, бердәм дәүләт имтиханнарын югары баллга тапшыручылар да бихисап. Яраткан укытучыларының эшен дәвам итүче укучылары да Резида ханымның зур горурлыгы. Резида апа тормышында да һәркемгә үрнәк шәхес. Тормыш иптәше Нургаяз белән ике кыз тәрбияләп үстерделәр. Фәридәләре бүгенге көндә югары белем алып, район үзәк хастаханәсендә эшли, Зөлфияләре чыгарылыш сыйныф укучысы. 
Төпчек килен Раилә дә өлкәннәре кебек ачык йөзле, туган җанлы, олыларны олылап, кечеләрне хөрмәтләп яши. Хезмәттәшләре аны төгәл, үз эшен җиренә җиткереп башкаруы, ачык һәм гадилеге өчен хөрмәт итә. Гаилә тормышы да күпләргә үрнәк, тормыш иптәше Раиф белән бер ул, бер кыз үстерәләр. 
Кыскасы, килендәшләр барысы да батыр, кулларында ут уйната, сүзгә тапкыр, чая һәм туры сүзлеләр. Бер-берсенә хөрмәт һәм ышаныч белән яшиләр.