Паспорт тапшыру "Халыклар дуслыгына" күчкәнме?

ГХАТ бүлеге җитәкчесе Люция Нигъмәтҗанова иң элек яшүсмерләрне паспортның килеп чыгу тарихы белән таныштырды, паспортка кагылышлы сораулар бирде. Укучылар әлеге сорауларга дөрес җаваплар биреп, үзләренең белемнәрен ныгытып кына калмадылар, ә тапкырлыкларын да күрсәтеп, үзләренең тормышларындагы иң кирәкле мөһим документка - Россия паспортына ия булырга хокуклы булуларын дәлилләделәр.
Паспортны укучыларга тантаналы төстә район миграция хезмәте бүлеге җитәкчесе Рамил Хафизов тапшырды. Бу чарада шулай ук Бөек Ватан сугышы ветераны, "Халыклар дуслыгы" музее директоры Гарифҗан Галиев, район ветераннар Советы рәисе Рифат Абдуллин һәм музей хезмәткәрләре дә катнашты. Алар балаларга фатиха итеп, "Районыбызның 14 яше тулган яшь гражданнары, Сез паспорт алган бу көнне зур бәйрәм буларак кабул итсәгез иде!" дип, теләк-тәкъдимнәрен ирештерделәр.
Чыннан да, әлеге көн укучылар күңелендә озак сакланыр. Аларга биредәге хезмәткәрләр музей заллары буйлап экскурсия оештырдылар һәм истәлекле бүләкләр тапшырдылар.