Рәхмәт хаты яки шәфкатьле кешеләрнең күп булуы сокландырды

Юлда йөргән вакытта бар нәрсә дә үзеңнән генә тормый шул. Юл кагыйдәләрен төгәл генә үтәп,ашыкмый гына кайтып килгән җирдән, каршы як полосадан баручы кинәт кенә килеп чыккан машина белән кара-каршы бәрелештек. 

Шәфкатьле кешеләрнең күп булуына тагын бер кат инандык.Бер билгесез кешеләр безгә ярдәмгә ташландылар. Шундый вакытта бигрәк тә кеше ярдәменә мохтаҗ буласың. Кызым яныннан бер минутка да китмәгән шәфкатьле Арча хатыны Талиягә һәм аның тормыш иптәшенә,Балтач хастаханәсе табибәсе Гөлназ Альфредовнага без бик рәхмәтле. Ашыгыч ярдәм машинасы белән Арча хастаханәсенә алып килгәндә инде туганнарым,мин эшләгән оешманың мәрхәмәтле җитәкчесе Наил Гыйләҗев, хезмәттәшләрем ярдәм кулларын сузарга әзер булып торалар иде. 
Безнең шушындый фаҗигага юлыкканны белгәч,авылдашлар,мине белгән күрше-тирә авыл кешеләре матди һәм рухи ярдәм кулы суздылар. Мин, шушы алдан санап киткән кешеләргә,туганнарыма, хезмәттәшләремә,күршеләргә, барлык Кили авылы халкына ихлас күңелемнән чиксез рәхмәтләремне җиткерәсем килә. Безне савыктыруда үзләренең көчләрен кызганмаган Арча хастаханәсе хезмәткәрләренә, гомумән,безнең бу хәсрәтне үз йөрәкләре аша уздырган барлык мәрхәмәтле кешеләргә рәхмәтлебез. Берегезгә дә бәла-казалар,борчу-хәсрәтләр килмәсен. Кылган игелегегез үзегезгә меңе белән кайтсын,гаиләләрегезгә иминлек муллык телибез. Юл кагыйдәсен бозып йорүчеләр үзләрен генә тугел, башкалар турында да уйлансыннар иде. Бер гаепсез кешеләрне күпме газапка салалар бит! 
Рафил Хафизов, 
Кили авылы