Сабантуйны көтә иде әти...

Сабантуйны көтә иде әти 
Тальян сузар өчен иртәннән. 
Тик әтинең гармун тавышлары 
Иштелми инде күптәннән. 

Сабантуйны көтә иде әти 
Гармун тартыр өчен мәйданда. 
Бәйрәмдәге кызык-мызыкларны 
Көлеп сөйләр өчен хәйранга. 

Сабантуйны көтә иде әти, 
Мәйданнарга атлар кергәнен. 
Күзәтергә ялларында атның 
Уйнаклавын шаян җилләрнең. 

Сабантуйны көтә иде әти, 
Атлар узышканын карарга. 
Сызгырыпмы, кычкырыпмы шунда- 
Дәрт өстәргә җайдак малайга. 

Сабантуйны көтә иде әти, 
Күрер өчен таныш-белешне... 
Читтә йөргән кемнәр кайткан икән- 
Гадәттә, ул алдан белеште. 

Сабантуйны көтә иде әти- 
Ап-ак күлмәк кияр килешле. 
Түбәтәен әни әзер итәр, 
Ука-сәйлән кушып чигешле. 

Сабан туе көнне киттең, әти, 
Мәйданнарны күктән күзләргә. 
Июнь башы җитсә, сине көтәм- 
Ел да күңлем шулай үзгәрә. 

Ел да килә язлар, Сабантуйлар, 
Киләм мин дә мәйдан карарга. 
Син җитмисең әти, син чыкмыйсың 
Гармун белән безнең арага. 
Лилия Нәкыйпова 
Июнь, 2019