"Салават күпере" балалар бакчасы сабыйлары әби-бабаларын бәйрәмгә дәште

Бакчаның икенче номерлы зурлар төркеме өлкәннәргә хөрмәт күрсәтүне бик тә җылы шартларда, кызыклы итеп оештырган, балалар җырлап-биеп кенә калмадылар, "Сертотмас әкият"не дә театральләштерделәр, видеоэкраннан әби-бабаларына багышлап шигырьләр дә сөйләделәр, үзләренең нәни куллары белән, нәни йөрәкләренең җылысын кушып ясаган бүләкләрен дә тапшырдылар. Бик бәхетле иде сабыйлар, аларны алларына утыртып фотога төшкән әби-бабалар да, мөгаен, үзләрен бик бәхетле итеп хис иткәннәрдер.

"Безнең төркем балаларының әби-бабалары барысы да мактауга гына лаек, - ди өлкән тәрбияче Лилия Галимуллина.- Күбесе оныкларын бакчага китерә, алып китә, ярдәм итәргә атлыгып тора, кайчакта шигырьләрне, өйгә кушкан шөгыльләрне дә әби-бабай белән эшләп килдек, диючеләр күп. Тәрбия өлкәсендә шундый өлкәннәр белән эшләү безгә дә зур куаныч, әти-әниләргә дә терәк булырдай кешеләре булгач җиңел. Рәхмәт аларга! Исән-сау яшәсеннәр, оныкларыннан игелек күрсеннәр".

Биредә әби-бабалар бистәдән генә түгел, ерак авыллардан да бар, мәсәлән, танылган Батыр-көрәшче Айдар Хәйретдиновның улы Алмаз әлеге төркемгә йөри, аның бабасы Фоат ага Арбордан кадәр оныгының шатлыгы белән уртаклашырга килгән.