Сорау-җавап: “Сотовыйдан 01не җыйганда тагын нинди сан өстисе?”

Укучыбыздан сорау-тәкъдим: “Сотовыйдан 01 не җыя белмибез икән, тагын ниндидер сан өстисе бугай. Ярый домашка эшләде, шуннан җыйдым. Аны берәр җиргә, барлык кеше белсенгә язып куя алмыйсызмы, күп кешенең өй телефоны юк бит хәзер”.

Балтач һәм Кукмара районнарының өлкән инспекторы янгын булса, кая шалтыратасын аңлатты:
“Янгынны шунда ук күреп, өйдәге телефоннан «01» яки «101»не җыясы. Ә кәрәзле телефоннан «112»не җыеп, ашыгыч хезмәтләрнең Бердәм чакыру номерына шалтыратырга кирәк. Янгын белән бәйле стресслы хәл вакытында күпләр үз адресларын да, телефоннарын да, хәтта исемнәрен дә оныталар. Моны булдырмас өчен, янгын очрагындагы барлык төп мәгълүматлар яхшы күренергә генә түгел, телефон аппараты янында беркетелергә тиеш. Өйдә кечкенә балалар яки олы яшьтәге кешеләр яшәсә бигрәк тә. Онытмагыз, янгын вакытында секундлар-минутлар бик мөһим, шуңа күрә монда бернинди паника да булырга тиеш түгел. Шунда ук янгын сүндерү хезмәтенә хәбәр итәргә кирәк”.