Татарстан блогерлары сентябрь сайлауларында мобиль күзәтүчеләр булачак

Татарстан блогерлары ТР Президенты һәм җирле совет депутатларын сайлауда мобиль күзәтүчеләр булачак. Бу хакта республиканың Иҗтимагый палатасы рәисе Зилә Вәлиева җәмәгатьчелек вәкилләре белән очрашуда хәбәр иткән. 

«Күзәтүчеләрнең мобиль төркеменә беренче тапкыр блогерлар Төркеме керүе миңа бик күңелле һәм кызык. Без сезгә (блогерларга) өметләнәбез, сез кешеләр белән аралашуның зур тәҗрибәсенә ия. Аудитория – зур потенциал. Гомумән, эш кызыклы булачак, һәм сез тавыш бирү процедурасы өчен күп нәрсә эшли аласыз», – дип билгеләп үткән Зилә Вәлиева.

Аның сүзләренә караганда, ТР Иҗтимагый палатасы яшьләр оешмалары белән актив эшли. Россия Конституциясенә төзәтмәләр буенча тавыш бирүдә Татарстанда күзәтүчеләрнең 25 проценты яшьләр оешмалары вәкилләре булган, бу ил буенча уртача иң югары күрсәткечләрнең берсе.

«Бу безнең өчен яңа тәҗрибә. Ә минем моңа шәхси кызыксынуым бар, өлкән улым мәктәптә даими рәвештә сайлаулар турында сорый, барысы да ничек оештырылуы турында. Аның барлык сорауларына да җавап бирермен, бөтен процедураны эчтән белермен дип уйлыйм», – дип сөйләгән блогер Алинә Гыймалтинова.

Очрашу ТР Иҗтимагый палатасында узган, анда Зилә Вәлиева блогерларның сайлау участокларында вазифаларына һәм башка хәлләргә кагылышлы сорауларына җавап биргән.

Элегрәк Россиянең Үзәк сайлау комиссиясе Татарстан күзәтүчеләрен сайлауларга әзерләнергә һәм законнарны актив өйрәнергә өндәгән.

Фото: «Татар-информ»