«Татарстан көзгеләре» экопроекты Бөтенроссия конкурсында тавыш бирүдә җиңде

Татарстанның зәңгәрсу күлләрен төзекләндерү буенча «Татарстан көзгеләре» республика экопроекты Бөтенроссия экотуризмны үстерү конкурсында халык тавыш бирүендә җиңгән, дип хәбәр итә ТРда туристлык-рекреацион кластерларны үстерү буенча команда.

«Татарстанлыларның актив ярдәме белән «Татарстан көзгеләре» экокластеры туристик-рекреацион кластерлар булдыру һәм экотуризм үсеше буенча бөтенроссия конкурсында беренче урынны алды», - диелә хәбәрдә.

Проект 18 мең 476 лайк җыйган. Тавыш бирүдә барлыгы 36 финалист катнашкан. Конкурста катнашкан икенче Татарстан проекты, «Кама Тамагы» экокурорты шулай ук халык тавыш бирү нәтиҗәләре буенча топ-10га эләккән. Ул, 8 мең 810 тавыш җыеп, дүртенче урында калган.

Бүген, 16 октябрь көнне, Тулада халык тавыш бирү һәм бөтен конкурс җиңүчеләрен бүләкләү тантанасы уза. Жюри федераль ярдәм алачак проектларны игълан итәчәк. Шунда ук халык тавыш бирүендә җиңүче буларак «Татарстан көзгеләре» экокластеры нинди приз алачагы билгеле булачак.

Фото: «Татар-информ» архивы / Салават Камалетдинов