Тәбрикләү сүзе

Без – авыл хуҗалыгы районы. Районыбыз халкының тулаем тормыш-көнкүреше авыл хуҗалыгы белән турыдан-туры бәйләнгән. Шуңа да бу бәйрәм – Авыл хуҗалыгы хезмәтчәннәре көне башка барлык һөнәри бәйрәмнәргә караганда да күпчелегебез көтеп ала торганы, мәртәбәлесе, кадерлесе диясе килә.

Әлеге бәйрәм чорында районыбызның авыл хуҗалыгы җәмгыятьләре, фермерлары, шәхси хуҗалыгында мал-туар асраучылар үзләрендә җитештерелгән продукцияләре белән район үзәгендә һәм Чепьяда узучы традицион ярминкәләрне башлап җибәрәләр, авылда җитештерелгән төрле продуктлар белән республикабыз башкаласы – Казан каласы халкын да сөендереп торалар.

Яңа сынаулары белән килгән быелгысы елда кырларда һәр гектардан 30,3 центнер уңыш җыйнап алдык. Икмәкле дә булдык, маллар өчен азыклы да. Игенче-механизаторларыбызның хәзерләгән азыкларны нәтиҗәле файдаланып, терлекчеләребез дә продукция җитештерүне елдан-ел арттыралар, республика күләмендә электән яуланган алдынгылыкны ышанычлы тоталар.

Хөрмәтле авыл эшчәннәре! Гаять тә кирәкле, җаваплы һәм дәрәҗәле, авыр хезмәтегез, каһарманлыгыгыз соклануга һәм мактауга лаек. Һөнәри бәйрәмегез белән ихлас күңелдән котлыйм. Гаиләләрегезгә тигезлек, иминлек, муллык телим. Тормышыгызда рәхәтлекләр, шатлыклар күп булсын, сәламәт булыгыз.

Рамил Нотфуллин,
Балтач муниципаль районы башлыгы.

Баш мөхәррир фотосы.