Алкогольле төшке аш нәтиҗәсе

Автомобильдә йөрүчеләр генә түгел, трактор белән идарә итүчеләр дә ЮХИДИ хезмәткәрләре һәм участок вәкилләре тарафыннан тикшерелеп торалар. 

Сәрдегән авылында туып үсеп, бүгенге көндә Балтачта яшәүче язма герое да районыбызның бер оешмасында тракторда эшләүче булган.

18 июнь көнне участок вәкиле «МТЗ-82» тракторын туктатып, механизаторның документларын тикшерә һәм шул вакытта аның алкоголь кулланганын сизеп ала. Трактор йөртүче махсус приборга өрергә дә, хастаханәгә барып медицина тикшерүе үтәргә дә каршы килә, үзенә карата төзелгән беркетмә белән тулысынча килешә. Суд барышында тракторчы төшке ял вакытында 200 грамм аракы эчтем, аннан эшләдем һәм эш тәмамлангач, Яңгул авылыннан кайтыр юлга чыктым, шул вакытта мине участок вәкиле туктатты, дип аңлата. Тракторчы үз гаебен таный. 

Суд карары нигезендә, тракторчы РФ административ хокук бозулар Кодексының 12.26 маддәсе 1 өлеше нигезендә гаепле дип табыла һәм бер ел да алты айга транспорт чарасы белән идарә итүдән мәхрүм ителә, шулай ук 30 мең сум күләмендә штрафка тартыла.