Машиналарга техник карау үткәрү ирекле булачакмы?

Автор, 14 июнь 2021 - 11:11

3200

Эчке эшләр министрлыгында җиңел автомобильләргә техник карау үткәрү-үткәрмәүне аның хуҗасының үз иркенә куюны тәкъдим иткәннәр.

Машиналарга техник карау үткәрү ирекле булачакмы?

Моңа кадәр автомобильләргә техник карау үткәрү мәҗбүри иде, хәзер бу җәһәттән тормышыбызга яңалык кертмәкчеләр. Һәрхәлдә, Русия Эчке эшләр министрлыгы бу эшне җиңел машиналар ияләренең үз иркенә куймакчы.

Русия ЮХХДИ җитәкчесе Михаил Черников белдерүенчә, һәр кеше үз автомобиленең төзек булуын үзе хәстәрли, чөнки бу аның һәм гаилә әгъзаларының хәвефсезлеген тәэмин итү икәнлеген яхшы аңлый. Ә менә пассажирлар һәм йөкләр ташучы машиналар өчен техник карауны элеккечә мәҗбүри итеп калдыру дөрес булачак.

Бер көн элек Дәүләт думасы ОСАГОны рәсмиләштерү өчен кирәк булган документлар исемлегеннән диагностик картаны төшереп калдырды да инде. Ә элегрәк алынган диагностик карталар белән 2021 елның 1 октябренә кадәр файдаланырга мөмкин, аларның вакыты озайтылды, дип яза Кызыл таң.