Юл бирмәү аянычлы тәмамланды, пассажир хастаханәдә

Бүген көндезге сәгатьләрдә Казанга китә торган боҗрада (круговойда) “Мицубиси” һәм “ВАЗ-21103” машиналары катнашында юл һәлакәте килеп чыга. Районыбызга чит республикадан килгән чит ил машинасының шоферы биредәге юл билгеләренә игътибар итмәгәнме, әллә инде кагыйдәләрне бозарга булганмы, ансысы билгесез, ләкин ул безнең ил машинасына юл бирмичә, авария килеп чыгуга сәбәпче була.

“Мицубиси” пассажирын ашыгыч ярдәм бригадасы хастаханәгә алып китә. Бүтән зыян күрүчеләр юк, дип хәбәр итәләр район ЮХИДИ бүлеге хезмәткәрләре.

Хөрмәтле райондашлар, юлларда сак булыйк, кагыйдәләрне онытмыйк.