Актив булсаң, билет бирәләр

«Районыбызда эшләп килүче инвалидлар җәмгыяте Казан белән бергә чын итеп эшли башлады, — дип хәбәр итте безгә бу өлкәдә җәмәгать эшләрен актив рәвештә алып баручы Чулпан Габделганиева.

— Инвалидлар җәмгыятенең райондагы оешмасы җитәкчесе — Рамазан Фәрзиев, мин  Һәм Марс Сәләхетдинов специалист булып торам, тагын хисапчыбыз Ева Александрова  бар.

25 апрель көнне Тукай көненә багышланган кичәдә безнең кайбер актив вәкилләребезне Татарстан инвалидлар җәмгыятенә член итеп кабул иттеләр, билетлар тапшырдылар. Болар гади генә түгел, Казан һәм Бөтенрәсәй оешмасы карамагында тапшырыла торган билетлар, дипломнар да кайтачак әле, диделәр. Мөмкинлекләре чикле кешеләргә тагын да күп чараларда катнашырга, уңышлар яуларга зур этәргеч булды бу.

Бу билетлар әле алга таба да тапшырылачак, әзер булуга, үткәргән чараларда әкренләп биреп барачакбыз. Шушы зур яңалыгыбызны райондашлар белән дә уртаклашасым килде».