«Җаным һаман сезнең янда яши» бәйгесе нәтиҗәләре билгеле

Балтач төбәгенең Таузар авылы кызы, күңелләргә үтеп керә торган сихри тавышлы Эльвира Ибраһимова – танылган журналист, диктор, «Татарстан», «Болгар», Актаныш, Биектау FM радиостанцияләре дикторы, «Азан» һәм «Иман» радиолары аша ислам кыйммәтләрен халыкка таратучы, «Ярдәм» милли ислам хәйрия фондының алыштыргысыз хезмәткә-ре булды. «Татмедиа» җәмгыяте филиалы булган «Хезмәт» газетасы, район мәгариф идарәсе, мәдәният бүлеге һәм дә Таузар башлангыч мәктәп-балалар бакчасы игълан иткән конкурсның максаты һәм бурычлары – сәнгатьле сөйләмгә омтылыш булдыру, нәфис сүз осталарын барлау һәм аларга иҗади үсеш өчен шартлар тудыру, татар телен, әдәбиятын һәм мәдәниятен пропагандалау, Таузар илендә туып, кыска гына гомере эчендә халык күңелендә жуелмас эз калдырып киткән якташыбыз Эльвира Ибраһимова белән горурлану хисе тәрбияләүгә корылган иде.

– Быел 3 яшьтән алып 60 яшькә кадәр 160 конкурсант катнашты, – ди бәйгенең оештыру эшләрен алып баручы, Таузар башлангыч мәктәп-балалар бакчасы директоры Римма Низамиева. – Укытучылар һәм тәрбиячеләр, төрле һөнәр ияләре дә бу бәйгедән читтә калмады. Чыгышлар 4 яшь аралыгына бүлеп каралды һәм аларны мәдәният, сәнгать, мәгариф өлкәсендәге белгечләрдән торган мәртәбәле жюри бәяләде.

Бәйге әле берничә ел гына үткәрелүенә карамастан, елдан-ел киңрәк колач ала бара. Быелгы бәйгегә Казан шәһәре, Балтач, Саба, Биектау, Кукмара, Актаныш, Арча районнарыннан бик күп эшләр килде. Катнашучылар Эльвира Ибраһимова репертуарыннан булган һәм туган телгә, туган илгә, әниләргә багышланган тезмә әсәрләрне башкару номинацияләрендә үз чыгышларын тәкъдим иттеләр.

Бәйгенең җиңүчеләре булып, Нормадагы «Тургай» балалар бакчасы Руфинә Ризванова, бистәнең 1нче номерлы балалар бакчасыннан Арсен Фролов, Норма урта мәктәбе укучылары Раидә, Раян Мәрдановлар, Норма урта мәктәбе укучысы Раил Мәрданов, Сосна төп гомуми белем мәктәбе укучысы Солтан Гыйбадуллин, Галимҗан Баруди исемендәге Биектау 4 номерлы урта гомум белем бирү мәктәбе укучысы Амелия Феофанова, Актаныш муниципаль районы Байсар төп гомуми белем мәктәбе директоры, автор-башкаручы Рамил Сәлахов, Норма авылыннан Рузия Галиева, Аксубай районы 3нче номерлы гомуми белем бирү мәктәбенең башлангыч сыйныф укытучысы Лилия Зәйнуллина танылды. Гран-прига Актаныш районы Пучы урта гомуми белем бирү мәктәбенең 8 сыйныф укучысы Нәзлия Латыпова лаек булды (җитәкчесе Гөлназ Муллагалиева). Җиңүчеләргә бүләкләрне «Милли мәдәниятләр һәм гореф-гадәтләр елы» ачылышы кысаларында «Хезмәт» газетасы редакциясе җитәкчесе – баш мөхәррир Вакыйф Зәкиев тапшырды.

Зөлфия Шакирова