Балтачта тротуарларны кем чистарта? (+фото)

Беренче кар көттереп кенә яуса да, табигать үзенең холкын күрсәтә башлады. Буранлы көннәрдә юлларны күз ачып йомганчы кар баса. Редакциябезгә бу уңайдан зар-моңнар да килеп ирешә. Зарлы сорауларга Балтач шәһәр җирлеге башкарма комитеты җитәкчесе Илдар Дамир улы Габдрахманов җавап бирә.

- Илдар Дамирович, Балтачыбызда акрынлап тротуарлар проблемасына нокта куела кебек. Әмма аларны чистарту мәсьәләсе ничек хәл ителә?

- Чыннан да, бистәбездә тротуарлар  саны арта.  Халык әлеге уңайлыклардан бик канәгать. Кышын тротуарларны кардан чистартуда  да әлегә каршылыклар юк. Иң беренче мәгариф учреждениеләре янындагы тротуарлар кардан чистартыла.

- Тротуарларны чистарту өчен кайсы оешма җаваплы?

- Әлеге эш өчен  “МДСУ-1” оешмасы җаваплы.

- Илдар Дамирович, тротуарлар чистартылмаганда кайда мөрәҗәгать итәргә?

 - Проблемалы участоклар булган очракта, “МДСУ-1” оешмасына 2-54-46, 2-43-66 һәм Балтач шәһәр җирлеге башкарма комитетына 2-52-15 телефон номерларына шалтырата аласыз.

P.S. Бистә халкы шуны аңласын иде: буран барышында ук бөтенесен дә идеаль хәлгә килерлек итеп чистартып өлгерү һич мөмкин түгел.