Без аларга рәхмәтле (фото)

Республикабызда барган «Рамазан — изге гамалләр ае» хәйрия марафоны кысаларында Чапшар авылының ир-егетләре игелекле гамәлләр кылалар. 

Беренче эш итеп алар мәчетнең керү ишеге баскычына, олы кешеләргә тотынып менү өчен уңайлы итеп баскыч култыксасы (перила) ясап урнаштырдылар. 

Яшь буынга дини тәрбия бирүне яхшыртып, мәчеткә балаларның күпләп йөрүләрен кызыксындыруны ният итеп җәйге лагерьлар һәм дини дәресләр вакытында файдалану өчен попкорн ясау аппараты сатып алып бүләк иттеләр. 

Әлеге изге эшләрдә башлап, оештырып йөрүче олы йөрәкле авылдашларыбыз Раушан Шиһабетдинов, Айрат Гыймадиев, Алмаз Мадияров һәм исемнәре аталмыйча, үзләренең өлешләрен керткән иптәшләргә авыл халкы исеменнән эчкерсез, ихлас күңелдән чыккан рәхмәтебезне җиткерәбез. Аларга нык сәламәтлек, гаилә бәхете һәм тормыш юлларында уңышлар гына насыйп булуын теләп калабыз. 

Вагыйз Шиһабетдинов,

Чапшар авылы старостасы