Безне онытырга ярамый

Һәлакәт нәтиҗәләрен бетерү өчен, радиацияне башка җирләргә таралмавын булдырмау максатыннан, илебезнең барлык төбәкләреннән, шул исәптән Татарстаннан да 4000гә якын кеше катнашты. Һәлакәт нәтиҗәләрен һәм радиациянең таралуына юл куймас өчен ликвидаторлар батырлык һәм фидакарьлек күрсәтмәсәләр, әлеге фаҗиганең масштаблары күпкә зуррак булыр иде. Фаҗига урынында берничә ел дәвамында эш барды. Ликвидаторларның зарарланган зонада эшләгән һәр көне тормышлары өчен куркыныч булып яный, атом станциясендә уздырган һәр эш- минуты сәламәтлекләренә зыян сала. Гадәттән тыш хәлләр шартларында үз бурычларына тугры калып, алар илебез халкын радиация нурларының үтергеч тәэсиреннән сакладылар. Бу кешеләр үзләрен герой дип атамый, әмма күрсәткән хезмәтләре - чын каһарманлык. Аларның батырлыгы үрнәгендә яшь буында гражданлык җаваплылыгы, Ватанга мәхәббәт тәрбияләнә.

Республикада бүгенге көндә ике мең ярымга якын ликвидатор яши, аларның күбесе нурланыш кичерү нәтиҗәсендә инвалид булдылар. Бүгенге көндә һәлакәтне бетерүдә катнашучыларга барлык яктан ярдәм итү, аларның сәламәтлекләрен саклау, тормыш дәрәҗәсен яхшырту һәм чернобыльчеләрнең батырлыгын мәңгеләштерү ил алдында торган бурычларның берсе дип саныйм.

26 апрель Чернобыль атом электр станциясендә булган һәлакәт нәтиҗәсендә туганнарын һәм якыннарын, дусларын һәм якын иптәшләрен югалткан якташларыбызның кайгысын уртаклашу һәм аларны искә алу көне дә. Алар тиеш һәм мөмкин булганның барысын да эшләделәр, җирдәге тормышны саклап калу өчен үзләрен куркыныч астына куюдан да курыкмадылар. Чернобыльнең исән ветераннары алдында түбәнчелек белән баш иеп рәхмәт белдерәбез. Аларның батырлыклары һәм фидакарьлекләре белән горурланабыз. Чернобыльчеләрнең исемнәре онытылырга тиеш түгел.

Чернобыльчеләрнең райондагы оешмасының элеккеге рәисе: Шамил Зәйнуллин.

Фото: hotology