Бәрәкәтле гомер юлы

Алар Балтач бистәсендә яшиләр, табигатьләре белән икесе дә авыл кешеләре, туган җиргә береккән, туган туфракта үз бәхетен тапкан язмыш ияләре. Илсур һәм Фирая кебек бер-береңне аңлап, яратып һәм яратылып яшәгәндә, нигезең бусагасыннан алып кергән малың хәләл саналып, тырыш хезмәт белән табылганда, сабыйларның шатлыгы белән шатланганда татыган татлы мизгел - бәхетнең үзедер ул. 36 ел иңне-иңгә куеп, авырлыкларны, сөенечләрне бергә кичереп яшәү - аздырмы, күптерме, әмма бу пар: "Гомер үткәнен тоймый да калдык",- диләр.

Шушы көннәрдә Илсур абыйның 60 яшьлек юбилеен каршы ала. Кай арада үткән бу гомер диген.

1955нче елда Кыргызстанның Ош өлкәсендә дөньяга килгән егетнең балачагы, яшьлеге Смәел авылында үтә. Биредә мәктәптә укый. Армия сафларында хезмәт итеп кайта,

1976нчы елда райпога рәссам булып эшкә урнаша. Ветеринария техникумында белем ала. 1979нчы елда "Хезмәт" газетасына корреспондент булып эшкә килә, соңрак авыл хуҗалыгы бүлеге мөдире итеп билгеләнә, җаваплы сәркатип-редактор урынбасары булып эшли.

Тырыш хезмәте өчен районның Мактау таныклыгы белән дә бүләкләнә. Сәрдегән кызы Фирая белән гаилә корып, өч бала тәрбияләп үстерәләр. Олы уллары Илнар финанс-икътисад университетын тәмамлый. Кызлары Регина аграр университетта белем ала, Резедалары медицина университетын тәмамлый.

Балалар үскән, инде оныклар багар чак. Әби дә, бабай да оныклар тәрбияләүдә олы таяныч. Олыгайган көннәреңдә газизләреңә кирәк һәм терәк булып яшәүдән дә мөһимрәк ни бар икән?!Бу яктан Илсур абый бик тә бәхетле әти һәм дә бабай!