Быел кече бизнесны исәпкә алу бөтен ил буенча узачак

2021 елның язында Росстат Россия Федерациясенең барлык төбәкләре буенча кече бизнесның икътисади исәбен алып барачак.

Дәүләткә кече предприятиеләрнең, шәхси эшкуарларның ничек яшәвен, аларны нинди проблемалар борчуын белү мөһим.

Икътисади халык санын алу барышында тупланган мәгълүматлар нигезендә дәүләт карарлары һәм ярдәм программалары кабул ителәчәк.

Район статистика бүлеге 1 апрельгә кадәр кече бизнес вәкилләреннән электрон рәвештә анкета тутыруларын сорый. Анкеталарны дәүләт хезмәтләре порталы, Росстат интернет-сайты (электрон санлы имза булганда), электрон документ әйләнеше операторларында тутырырга мөмкин.

Шулай ук тутырылган анкетаны кәгазьдә район статистика бүлегенә китереп яки почта аша җибәрергә дә мөмкин.

Анкеталар кече предприятиеләр һәм шәхси эшмәкәрләр өчен аерым эшләнгән.

Росстат Сез биргән мәгълүматның конфиденциальлеген гарантияли. Барлык мәгълүматлар да гомумиләштерелгән рәвештә кулланылачак.

Мондый төр исәпкә алу биш елга бер тапкыр үткәрелә һәм анда катнашу мәҗбүри.

Сораулар туган очракта район статистика бүлегенә мөрәҗәгать итәргә була.

Раушания Ганиева,
статистика бүлеге җитәкчесе.

Фото: pixabay.com/ru