Чепья авылында яшәүче 90 яшьлек Гарифҗан ага сайлауга үзе килде

Чепья авылында яшәүче Гарифҗан ага Галиев инде олы яшьләрдә булуына карамастан, сайлауга таякка таянып булса да килде.

Чепья авылында яшәүче сугыш һәм хезмәт ветераны, “РСФСРның халык мәгарифе отличнигы”, “СССРның мәгариф отличнигы”, “Татарстан АССРның атказанган мәдәният хезмәткәре”, Балтач районының Почетлы гражданины Гарифҗан Гали улы Галиев райондагы иң өлкән сайлаучыларның берсе. 91 яше туларга санаулы гына көн калганда да әле 52 ел элек үзе нигез салган “Халыклар дуслыгы” музеенда директор булып эшләүче Гарифҗан ага, һәрбер сайлауда актив катнаша. Бу юлы да үзе тавыш бирә торган участокка иң беренчеләрдән булып килде һәм тавыш бирде.