"Хыял"да бүген хыяллар чынга ашты

Районыбызда барлыгы мөмкинлеге чикле һәм тәрбиягә алынган 243 бала гомер итә. Бәйрәм кичәсенә килә алган 93 баланың йөзендәге шатлык хисләрен сүзләр белән генә аңлатып бетерү мөмкин түгел иде. Аларның самими карашларында Яңа елдан - могҗиза, Кыш бабайдан - хыялдагы бүләк көтүләре чагыла. Балалар Яшел Чыршы тирәсендә Кыш бабайдан нинди бүләк өмет итүләрен санап чыктылар: серле бүләк, лего конструктор, коляска, айфон, кәрәзле телефон, компьютер... хәтта, нәни бәби сораучылар да булды.

Кыш бабайга һөнәрләрен күрсәткәннәр бәйрәм кичәсендә үк бүләкләнде. Бәйрәм сценариясе бик үзенчәлекле, мавыктыргыч итеп оештырылган иде. Африкага очарга соңарган клоуннар белән төрле кызыклы уеннар балаларны аеруча җәлеп итте: сабын көбекләре дә очырдылар, шарлардан төрле җәнлекләр дә ясап күрсәттеләр. Ә кино төшерергә килгән "режиссёр" белән "оператор" исә үзләренә яңа геройлар эзләү белән мәшгуль булды. Иң зирәк һәм тапкырлар, көчле һәм җитезләр дә бүләкләнде. Районкүләм "Тормышымдагы бәхетле мизгелем" инша бәйгесендә җиңүчеләр исә истәлек бүләгенә лаек булды. Көшкәтбаштан Ислам Гобәйдуллин, Субаштан Нәзир Гыйльманов, Югары Кенәдән Рания Мортазина язган иншалар иң яхшылары дип саналды. бирелде.

Фотоларны тулы күләмдә фотогалереяда карагыз.