Игътибар: уяу булыйк! (фото)

Кичә кич район башкарма комитеты җитәкчесе Айдар Хәйретдинов Балтач районының террорга каршы көрәш комиссиясе вәкилләрен, бүлек мөдирләрен оешма-предприятиенең кайбер җитәкчеләрен чираттан тыш киңәшмәгә җыйды. Сүз соңгы вакытта республикабыз территориясенә очып кергән идарәчесез очкычлар турында бара.

— Республикада булган хәлләр турында ишетеп беләсез, шуңа күрә уяу булырга кирәк. Нинди генә очракта да тормыш дәвам итә, кая гына барсагыз да, кайда гына һавада я булмаса юлда шикле әйберләр күрсәгез, чит-ят кешеләргә юлыксагыз, тиешле органнарга хәбәр итүегез сорала,- диде ул. 

Шикле әйберләргә юлыкканда 112 номеры буенча, я булмаса полициягә мөрәҗәгать итү кирәк. Шунысы бар, хәбәр ялган булмаска тиеш, ялган хәбәр икән, моның өчен җинаять җаваплылыгы каралган. 

Һәрбер җитәкче үзенең хезмәткәренә иминлек кагыйдәләрен искәртергә, инструктаж үткәрергә, гадәттән тыш хәл килеп чыкканда үз-үзен тотышына төшендерергә бурычлы.