Инвалид Нурия апа яңа мунчага куанып туялмый

Инде мәгълүм булганча, Норма авылында яшәүче, тумыштан инвалид өлкән кеше Нурия Газизовага яңа мунча салдылар. Бу хакта ТНВ каналы да Татарстан халкына җиткерде. Нурия апа Газизова «Наз» үзәгенең өйгә барып халыкка социаль хезмәт күрсәтү карамагында тора. Норма авыл җирлеге башлыгы Радик Наил улы Шәрипҗанов җитәкчелегендәге авылның мәрхәмәтле осталары ялгызы көн күрүче өлкән кешене бәхетле итте. Төзелеш материалларын да тулысынча үзләре сатып алып, мунчасын да эшче халык бушлай төзеп бирде. Нурия апа яңа мунчадан бик канәгать, авыл халкына, җитәкчеләргә рәхмәтләре иксез-чиксез аның. Элеккеге мунчасы бик тә күңелсез хәлдә иде инде. Мунча хәйрия эшен башкаручыларга якынча 150 мең сумга төшкән. Әлеге игелекле эш рәхимлелек үрнәге булып торсын иде. Норма җирлек башлыгы авыл халкы белән берлектә тулысынча бушлай мунча салып биргәндә, кайбер җирлекләрдә тумыштан инвалид булганнарның кәҗәләренә печән дә табып бирә алмый торганнар да юк түгел.