Җитәкче билгеләнде

Беренче көн тәртибе буенча Балтач район Советының даими комиссияләре һәм президиумы расланды.

Икенче көн тәртибе буенча Балтач районы башкарма комитеты җитәкчесе билгеләнде. Балтач районы башкарма комитеты җитәкчесе вазыйфасына конкурс уздыру комиссиясе секретаре Наил Сабирҗанов Балтач районы Уставының 46нчы маддәсенең 8нче пунктына нигезләнеп, конкурс комиссиясе тәкъдим иткән 2 кандидат арасыннан (берсе милек һәм җир мөнәсәбәтләре палатасы рәисе Фәнил Ибениев) район башкарма комитеты вазыйфасын башкаручы итеп Рамил Илдус улы Шакировны тәкъдим итте. Һәм Устав нигезендә депутатларның күпчелек тавыш бирү юлы белән район башкарма комитеты җитәкчесе итеп, Рамил Илдус улы Шакиров билгеләнеп куелды.

Өченче көн тәртибе итеп, Балтач муниципаль районы контроль-хисап палатасы рәисен билгеләү турындагы мәсьәлә каралды. Бу урынга бертавыштан 2012нче елның март аеннан контроль-хисап палатасы рәисе булып эшләүче Равил Кәримов билгеләнде.

Аннан Балтач муниципаль районының агымдагы елның тугыз аенда социаль-икътисади үсеше һәм 2016-2018 елларга фаразлар турында дүртенче көн тәртибендәге доклад белән район башкарма комитеты җитәкчесенең беренче урынбасары Илшат Галимуллин чыкты.

Бишенче көн тәртибе буенча Балтач муниципаль районының 2015 елга кабул ителгән бюджетының 9 айлык үтәлеше һәм 2016 елга беренче укылышта бюджеты турында район финанс-бюджет палатасы рәисе Рафис Ильясов доклад ясады.

Соңгы 6нчы көн тәртибе итеп, Балтач территориаль сайлау комиссиясе составына кандидатура тәкъдим итү турындагы мәсьәлә каралды. Кандидатура итеп, Балтач район башкарма комитетының әйдәп баручы белгече Алия Галиева тәкъдим ителде. Утырышны район башлыгы Р.Нотфуллин алып барды.

Кабул ителгән карарлар белән baltasi.tatarstan.ru сайтында таныша аласыз.