Көне кояшлы, күңелләр шат – сайлауга бәйрәмгә баргандай килделәр

10 кеше әле сайлауда беренче мәртәбә генә катнашучы яшьләр. Норма авылыннан 69 яшьлек Рәфыйк ага Фәхретдинов инде сайлау участогы ачылуга ук үз тавышын биргән - "нинди генә сайлау булмасын, иң беренче сайлаучыбыз ул безнең", диләр комиссиядәгеләр аның хакында. Иң яшь сайлаучы - Рәсим Шакиров, аңарга тәүге тапкыр сайлауга килүен исәпкә алып, ручка белән калын дәфтәр бүләк иткәннәр. Андый бүләкләр әле тагын үз ияләрен көтә.

"Бездә сайлаучылар бердәм йөри, барысы да теләп килә, күреп торасыз, нинди дустанә мөнәсәбәттә каршы алабыз, участокта рәхәт атмосфера хөкем сөрә",- ди комиссия секретаре Лилия Шәйхетдинова. Урамда музыка тавышы җөмһүриятебездә сайлаулар икәнлеген искәртеп тора. Килгән кеше сайлау бара торган мәдәният йорты фойесына урнаштырылган музейны да тамаша кыла. Анда шушы җирлекнең үткән тарихы, биредә яшәүчеләрнең , аларның әби-бабаларының тормыш-көнкүреше, нәкъ менә авыл халкынаннан җыелган экспонатлар куелган. Караган кешегә бик кызык.

Комиссия әгъзалары Айгөл Шакирова белән Асия Галимуллина участокка килеп, тавыш бирә алмаганнарның өйләренә бардылар, андыйлар биредә 52 кеше. Сайлатуга килүләрен алар өйгә кунак килгән сыман зарыгып көтә. Комиссия рәисе Раушан Мәрданов та алар белән.

Авыл кешесенең бәрәңге казу чоры булса да, беркем дә сайлаудан читтә калмады. Әнә, Кариледән Мөдәрис ага Йосыпов йөгерә-йөгерә килде, "сайлауның мөһимлеген аңлап барам, алгы көннәрнең якты, имин, бәрәкәтле булуын теләгән һәр кеше бирегә нәкъ менә минем кебек ашкынып киләдер", ди. Гаилә белән, балаларын җитәкләп килүчеләр дә күп иде.

Мөнир Зәйнуллин, Равил Маскутов, Рания Әшрәпованың кабинада тавыш биреп чыкканннарын көтеп тордым: "Сайлауга теләп килдек, без яшисе, балалар үстерәсе ил, хезмәт итәсе җир - киләчәгебезгәбитараф түгелебез, бар да әйбәт булсын, тормышларыбыз яхшырганнан-яхшырсын, дип тавыш бирдек", диделәр чын күңелдән. Участок вәкиле сайлауның тыныч кына баруын белдерде, "Бездә халык акыллы, тәртипле, гауга куптарып йөрүчеләр бу җирлектә яшәүчеләр арасында юк", дип белдерде.
Көн кояшлы, ямьле. Табигать сайлауларга нинди аяз һава торышы бүләк итте. Киләчәгебез дә шулай матур булыр әле.