Өйдә көндәлек бәйрәм

Гадәти ризыклар янәшәсендә бәйрәмнәргә генә табынга чыга торганнары өчен аеруча куана гаиләдәгеләр. Инде нәрсә пешерергә дә белмибез, элеккеге аш-су дәфтәрләрендәге рецептларны кабат искә төшердек дип язучылар бик күп инстаграм битләрендә. Ул исәптән без дә “Хезмәт” битләрендә аш-су бүлмәсе рубрикасы астында көндәлек төрле рецептлар биреп барабыз. «Сайтта дөнья күрүче «Аш-су бүлмәсе» рубрикасын бик яратып кабул иттек. Күбесе тиз һәм җайлы әзерләнә торган рецептлар. Көнендә үк әзерләп гаиләбез белән сыйланабыз. Шулай ук «Хезмәт» сайтында чыгучы бакчачыларга киңәшләр дә безгә ярдәмгә килә», дип яза Алсу исемле укучыбыз.
Аш-су осталары булган блогерлар исә туры эфирда мастер-класслар уздырып безне берсеннән-берсе тәмле ризыклар пешерергә өйрәтә. Бистәдәге бер кафе хуҗасы исә клиентлар белән элемтәләрне өзмәү максатыннан, инстаграм битләрендә онлайн кухняда төрле ризыклар пешерү серләре белән уртаклаша башлады.
Шунысы кызганыч, сыйлы табыннарга кунаклар гына чакырып булмый.