Районыбызның хөрмәтле транспорт хезмәткәрләре, мөхтәрәм ветераннарыбыз!

Әлеге бәйрәм руль белән идарә итүче һәркемгә дә кагылса да, асылда аны шофер һөнәренә ия булып, шул юнәлештә җәмгыятебезгә игелекле эшләр кылучы хезмәт ияләре горур рәвештә билгеләп үтә.

Районыбыз яшәешендә кайсы гына тармакка күз салмыйк, һәрберсенең эшчәнлеге шоферлар хезмәтенә бәйле. Безнең җирлектә эшләр һава, су транспорты аша башкарылмый, Балтачыбыз аша тимер юллар үтми, шунлыктан, бар авырлык әлеге күндәм, фидакарь һөнәр ияләре җилкәсендә кала.

Районыбызның социаль-икътисадый өлкәсендә шоферларыбыз зур роль уйный, алар ярдәме белән басу-кырлырыбызда игеннәр гөрләп үсә, ындыр табаклары ашлык белән тула, аларның тырышлыгы белән үзебездә җитештерелгән продукция кала халкына, хәтта чит өлкәләргә кадәр озатыла, аларның җитезлеге белән бистәбезнең, авылларыбызның йөзе үзгәрә, киләчәге яктыра - матур-матур йортлар, социаль объектлар калка, юллар яхшыра, төзелешләр бара, бер сүз белән әйткәндә, тормышыбыз ямьләнә. Бу күркәм һөнәрне хезмәт династиясенә әверелдереп, югары хезмәт үрләренә ирешкән буыннар чылбырының күп булуы да әлеге һөнәрнең дәрәҗәсен арттыра.

Кадерле шоферлар, хезмәт ветераннары! Районыбыз үсешенә лаеклы өлеш кертүегез өчен сезгә ихластан рәхмәтемне җиткерәм. Эшләрегездә һәрчак зур уңышлар, имин юллар, гаилә бәхете, шатлык-куанычлы көннәр, һәм барыннан да бигрәк корычтай нык сәламәтлек телим.

Рамил Нотфуллин,
Балтач муниципаль район башлыгы.