Рекорд куйган җитәкче (+фото)

 Килешәсездер, мондый уңышлы биографияле кешеләр күп түгел. Шулай ук утыз ел авыл Советын җитәкләүче буларак та героем районда бердәнбер булып чыкты. Дорга авыл Советын 28 ел җитәкләгән Гыйльмулла абый Дәүләтшин рекордын да яңарта ул. Күпләрегез инде сүзнең Арбордан Фоат абый Хәйретдинов турында барганын да чамалагандыр.

Аның белән очрашуга, иң элек әнә шул сорауларны бирдем. “Бик актив идем мин, бөтен ярышларда катнаштым, менә шуңа күрә армиядән кайтып, колхозда эшли башлауга, комсомол секретаре итеп сайладылар. Өстәмә эш дип кенә карамыйча, бик яратып эшләдем, җиде авыл яшьләре белән бик күп чаралар уздырдык, Казанга культпоходлар оештырдык... Аннан соң Чепья мәктәбенә штаттагы комсомол секретаре итеп күчерделәр. Анда да ел ярым шул рухта эшләдем”, – ди ул. 23 яшендә инде аны Чепьяга авыл Советы председателе итеп куярга дип, райкомга чакыралар. “Мин бик яшь әле, бармыйм,” – дигән сүзләренә андагыларның җавабы әзер була: “Без дә яшь идек”... Арбор белән ике арадагы җиде километрны ул башта ат җигеп йөри, аннан мотоцикл, бераздан иске больницаның “списать” ителгән машинасын бирәләр. Дүрт елдан егетне тагын райкомга чакыралар: ике генә елга Нөнәгәргә партоешма секретаре булып барырга диләр. Ул чакта инде гаиләле Фоат (уллары Айнур туган була), шуны сәбәп итмәкче була, тик бер төбәлгән  җитәкчелек үз фикереннән кире кайтмый. Ризалашмый чарасы калмый. Әмма анда күченгәненә һич тә үкенергә туры килми аңа.

–Шулкадәр яратып эшләдем, яратып яшәдем мин Нөнәгәрдә, – дип искә ала ул бүген. – Баруга фатир бирделәр, кешеләр, җитәкчеләр, белгечләр бик әйбәт – тагын нәрсә кирәк инде. Мин генә түгел, җәмәгатем Гөлсимә дә бик тиз ияләнде, улларыбыз Айдар белән Ренат шунда туды. Айнур белән Айдар беренчегә шунда мәктәпкә барды әле...