Сайлауга бару – бәйрәмгә барган кебек ...

Бистәдәге сайлау участокларында иртәнге сәгатьләрдән үк халык бик актив. Алар гаиләләре белән килеп үз тавышларын бирәләр. 1090нчы номерлы сайлау участогында иң беренчеләрдән булып, үз тавышын 42 ел халыкка көнкүреш хезмәте күрсәтү өлкәсендә эшләп лаеклы ялга чыккан Мәдинә апа Вәлиева бирде. Сайлауга ул "Матур киләчәк өчен тавышымны бирәм. Еллар имин, тормышларыбыз нык, килер көннәребез ышанычлы, илләребез тыныч булсын!" дигән якты теләкләр белән килгән.

Балтач бистәсенең урта мәктәп бинасында урнашкан 1088нче сайлау участогында сайлаучылар иртән активлык күрсәтәләр. Бу участокка Көек һәм Курмала авылы, бистәнең кайбер урамнарының өстәлүе сайлаучылар саны артуына китергән. Кайбер сайлаучылар, «шушылай чират торып, совет заманында сайлауда актив катнаша идек», дип яшьлек хатирәләре белән уртаклашып алырга да өлгерделәр. «Үзебезнең Президентны күптән сайлаган юк бит инде» дип фикерләрен җиткерергә дә онытмадылар. Балтач район башлыгы Рамил Нотфуллин да тормыш иптәше Фәния белән сайлау участогында. «Сайлаучыларның актив булуы күңелле, бердәм булгач, хезмәтнең нәтиҗәсе дә күркәм була», дип фикерләштеләр олы яшьтәге сайлаучылар район башлыгы белән.

Урта Көшкәт авылндагы участокта исә Татарстан Президентын электрон тавыш бирү җайланмасы аша сайлыйлар. Халык бер дә читенсенми, инде өченче сайлауларда электрон рәвештә тавыш бирәләр. Халык бәйрәмгә килгән кебек үзен хис итә - концерт номерлары бара, икенче кырыйда кайнар чәй һәм коймаклар белән сыйлыйлар.