Тарифлар буенча үзгәрешләрне киләчәк күрсәтер (фото)

Татарстан Республикасының Тарифлар буенча дәүләт комитеты рәисе Александр Станиславович Груничев Балтачтагы эшлекле сәфәре барышында коммуналь хезмәт күрсәтә торган оешма эшчәнлекләре белән танышты.

Элеккеге «Сельхозтехника» оешмасы территориясендә урнашкан скважина эшчәнлеге белән кызыксынды. Биредәге су белән Кариле авылының кайбер урамнарында яшәүчеләр дә тәэмин ителә.

Эшлекле сәфәрен дәвам итеп, Александр Станиславович Чепья коммуналь хуҗалыгына юл тотты. Оешма җитәкчесе Марат Кадыймов эшчәнлекләре турында сөйләп узды.

— Сезнең районда коммуналь хезмәт күрсәтә торган оешмаларның берничә булуы аптырашта калдыра. Шул сәбәпле тарифлар да төрле бит сездә, аларны бертөрле итеп, бу эшне бер оешма гына башкара торган итеп эшләүнең юлларын эзләргә кирәк, — диде Александр Станиславович.

Чепьяда вакытта ул биредә сишәмбе көнне эшли торган базар эшчәнлеге белән дә танышып чыкты. Данлыклы музейга да керде.

Ә Балтачта инде түгәрәк өстәл артында аңа карата булган сораулар яңгырады, ул үз тәкъдимнәрен җиткерде. Әлеге сәяхәтнең нинди нәтиҗәләр бирүен киләчәк күрсәтер.