Татарстан диңгезчеләре "Милонга" яхтасында дөнья тирәли сәяхәтне тәмамлады»

Татарстан диңгезчеләре «Милонга» яхтасында Татарстан АССРның 100 еллыгына багышланган Җир тирәли йөзүне тәмамлады. Бу хакта «Татар-информ» МА ТР Җилкән спорты федерациясенең элеккеге башлыгы Юрий Бродниковский хәбәр итте.

«Барып җиттек! Барысы да исән-сау», - дип билгеләде Агентлыкның әңгәмәдәше.

"Финита ля комедия!!! Без җир тирәли сәяхәт ясадык!!! Финиш", - дип уртаклаштылар яхта бортыннан экипаж әгъзалары.

Дөнья тирәли йөзү Төркиядә башланды, Төркиядә ул тәмамланды, дип сөйләде 72 яшьлек капитан Алмаз Алеев.

«Бүген җир тирәли сәяхәтебезнең финишы булды. Без Мармарис шәһәренең „Марина“ портында финишка килеп җиттек. Бортында тәртип, барысы да яхшы. 45 мең километрга якын юл үткән. Кавид эпидемиясе белән бәйле төрле җитешсезлекләр, ватылулар, тәртипсезлекләр булуы аңлашыла, әмма болар барысы да узды, барысы да әйбәт булды. Дөнья тирәли сәяхәт безнең тугыз айны тигез алды", - дип уртаклашты судно капитаны.

Элегрәк агентлык хәбәр иткәнчә, сәяхәт вакытында Татарстан диңгезчеләренә күп кенә каршылыклар белән очрашырга туры килгән. Аерым алганда, Яңа ел алдыннан Вануату хакимияте яхтсменнарны Тын океанда коронавирус чикләүләре катгый булу сәбәпле тоткарлаган. Моннан тыш, диңгезчеләр Татарстан әләмен Австралиядәге җирле диаспорага, шулай ук Аделаидадагы катгый чикләүләр аркасында тапшыра алмады.

Мармарис халкы татарстанлыларга бик җылы мөнәсәбәттә. Портта эшләүчеләр һәм гади шәһәрлеләр диңгезчеләргә ярдәм итәләр һәм алар белән уңай аралашалар.

"Диңгезчеләр шулай ук туган якларында сагындылар һәм Казан аэропортында якташларыбыз белән җылы очрашуга өметләнәләр", - дип өстәде Бродниковский.

Яхта Казаннан 2020 елның 28 июлендә чыккан. Җир тирәли сәяхәт ТАССРның 100 еллыгына багышланган иде: вакыйга логотибы җилкәнгә төште, ә яхта өстендә Татарстан әләмен йөрттеләр. Экипаж составына өч кеше керде: спорт мастеры, океан йөзүенең яхта капитаны һәм Татарстан җилкән спорты Федерациясе каршындагы җилкәнле мәктәп җитәкчесе 72 яшьлек Алмаз Алеев, 36 яшьлек боцман Вил Сәгыйтов һәм капитанның 32 яшьлек ярдәмчесе Илфат Миңнебаев, соңрак Иван Поликарпов алыштырган.

Бу вакыт эчендә диңгезчеләр 45 мең километрдан артык юл үткәннәр. Аларның маршруты Урта диңгез, Атлантик, Тын һәм Һинд океаннары аша узды. ТАССР флагы дөньяның уннан артык илендә булды. Алар арасында Марокко, Гибралтар, Кариб утраулары, Панама, Полинезия, Бали, Шри-Ланка, Мальдива, БГӘ, Мисыр һәм башкалар бар.

Фотолар «Милонга»яхтасыннан диңгезчеләр тарафыннан бирелгән.

Тулырак: ТИ