Хатын-кыз ул – тормыш яме

Әлеге сөйкемле туташ-ханымнарны «Гаилә тарихында гасырлар кайтавазы – без тарихта эзлебез» исеме астында нәсел шәҗәрәсе республика бәйгесенең муниципаль этабында төшереп алдык. Биредә әлеге бәйгедә җиңү яулаган Чапшар авылыннан Гаязовлар (сул якта), икенче урынны алган Нөнәгәрдән Тляковлар, өченче урынга лаек булган Соснадан Закировлар нәсел-нәсәбәсеннән дә ханымнар, туташлар бар. Ә уртада – өч нәселнең дә кадерле ядкарьләре – акъәбиләр, акъапалар утыра. Олысына-кечесенә карамастан, барысы да чибәрләр, кыюлар, карашлары күңелләргә үтәрлек, җитмеш җиде һөнәрне дә белә торганнардан. Аларның булдыклылыгы күргәзмәләрдә ачык чагылыш тапты.

Хатын-кыз бит ул менә шушындый матур, сабыр, акыллы. Авыр булса да алар «аһ» димәсләр, йөзләре һәрчак кояш кебек балкыр, үзен соңгы урынга куеп, һәрчак якыннары хакын кайгыртып яшәр. Шуңа да хатын-кыз бит инде ул, бу дөньяның матурлыгын, борчуын йөрәгенә сыйдыра белгән илаһи зат... Барлык ханымнарның-туташларның бәйрәмнәре котлы булсын, кадерле булып яшәргә язсын.