Йөрәкләрдән саркып чыккан ихлас рәхмәтләр...

Ничә генә яшьтә булсалар да, әниләрне югалту бик авыр, бик аяныч икән. 32 яшендә әтиебезне югалтып, ул безне, дүрт баланы, бик авырлыклар белән үстереп, укытты, кеше итте. Без аңа гомеребез буе рәхмәтләр укып яшәдек. Тормышлар уңайланып, барыбыз да үз куышларын корып, тынычлыкта яши башлауга, хәсрәтнең тагын бик ачысы - оныгы Альбертны, аның яралары бик азга гына төзәлде дигәндә бердәнбер улы - таянычы Мәсхүтне югалту... Барысы да бер йөрәккә, ничекләр түзеп яшәлгән?

Үзе генә булса бу хәсрәтләрне җиңәргә авыр булган булыр иде. Аллага шөкер, әниебез бәхетенә аның янында килене - туган апабыз Сәлимә, аның кызы Ләйлә сеңлебез, оныгы Зилә булды. Рәхмәтләребезнең иң олысын аларга әйтәсем килә, алар хөрмәтендә әниебез тәрбияле, ашлы-сулы, чиста-пөхтә булды. Калган гомерләре рәхәттә, сәламәтлектә, муллыкта узса иде, я Раббым.

Тагын рәхмәтләребез тәүлекнең кайсы вакытында чакыртсак та килеп җиткән авылыбыз фельдшеры Илзия Мадиярова, күршедәге барлык ак әбиләргә, апаларга, әниебезне җирләгәндә безнең белән бергә булган, безгә рухи һәм матди ярдәм күрсәткән барлык туганнарга, дусларга, күрше-күләнгә, авылдашларга, тирә-юньдәге авыллар халкына, кода-кодагыйларга, үзем эшләгән "Хезмәт" редакциясе коллективына, җитәкчебез Вакыйф Мансурович Зәкиевка, Тимирязев исемендәге күмәк хуҗалыкка, Нормадагы һөнәри белем бирү учреждениесына. Ходай берегезне дә рәхмәтеннән, ярдәменнән ташламасын, исән-имин, ачы хәсрәтләр күрмичә яшәгез.

14 июнь көнне әниебезнең туган көне булган булыр иде, бу язмам әниебез рухына дога булып барып ирешсә иде. Җаның тыныч, урының оҗмахта булсын, әниебез. Йөрәкләрдән саркып чыккан ихлас рәхмәтләребез сезгә мәрхәмәтле кешеләр. Әнине юксынып, барлык балалары, оныклары исеменнән Раилә Мөхәммәтҗанова, Чапшар авылы

Фото: vk.com