Вордскем кылмес ум вунэтэ!

29.12.2016 13:43 | Азьлане Принтерга

Вордскем кылмес ум вунэтэ!
Удмурт-а, ӟуч-а я бигер —
Эшъяськонмес герӟа юн герд.
Вераськиськом пӧртэм кылын,
Нош кыл тупа эшъёс пӧлын.
Ведь азьпала шудо дыре
Ваньмес нуэ одӥг сюрес.
А.БЕЛОНОГОВ
Шонер верам кылбурчи. Тани 2016 аре 12 толсуре юн герд герӟаз удмурт, пор но бигер нылпиосты Ципья шоръёзо дышетсконние. Та нуналэ национально-региональной компонент планэн дышетӥсь школаосысь пиналъёс люкаськизы кылбур веранъя но кырӟанъя устолыксэс возьматыны «Привет тебе, мой край родной» шуыса нимаськись творческой конкурсэ. Пиналъёс куинь туркымлы люкемын вал: нырысетӥ туркым — 1-4 классын дышетскисьёс, кыкетӥ — 5-8 классын, куинетӥ — 9-10 классын дышетскисьёс. ӝутскем мылкыдын лыктэм пиналъёс дышетӥсьёсынызы ӵош залэз тырмытӥзы. Татын чузъяськизы удмурт, бигер но пор кылын кылбуръёс но кырӟанъёс. Котькудӥз вормон вылысь дасяськем вал. Ми кылзӥм муспотон кадь чебер удмурт кылэз но, паськыт но вӧлмыт бигерзэ но, шулдыр но матын пор кылэз но. Жюрилы но туж секыт луиз умойёсыз пӧлысь эшшо но умойзэ пусйыны. Уката шугомизы 1-4 классын дышетскись пиналъёс пӧлысь самой умойёссэ бырйыны. Соос, угось, татын ваньмызлэсь уногес вал. Озьы ке но, милям Улын Ушма начальной школаысь дипломен бертӥзы кык пиналъёс: 1«б» классысь Антонова Елена «Самый юный исполнитель» номинациын призёр луиз, нош 4«б» классысь Петрова Ксения кыкетӥ инты басьтӥз. Кыкназы ик «Кылбур» номинацие пыриськизы. Нош «Вокал» номинацие пыриськем Никитин Евгений сертификатэн бертӥз.

Таӵе конкурс ортчытэмзы понна, Ципья шоръёзо школалэн администрациезлы но конкурсэз ортчытыны юрттэм вань ужасьёслы, дышетӥсьёслы бадӟым тау! Азьланяз но таӵе конкурсъёс мед ортчозы. Но со сярысь азьлогес ивортыны кулэ, дыр. Таизлы дасяськыны дыр ӧжыт луиз. Собере, жюрие но пиналъёсты дасям дышетӥсьёсты пуктоно ӧвӧл, мон сямен. «Незаинтересованной» жюрилы ужаны умойгес луоз.

Та конкурслы нимаса вордскем шаер сярысь кылбур гожтӥськем вал. Со кылбуреным лыдӟисьёсты но тодматӥсько.

Зарниен но, азвесен но...
Зарниен но, азвесен но,
Уг вошты мон дор палме.
Вордӥськем Вукогуртме но,
Ушмаысь но калыкме.
Балтаси ёросамы нюлэсъёсмы —
Котькытынлэсь шулдыресь.
…д ке оске милемлы —
Вуылэ! Пумитаны — котьку дась!
Ми дорын гинэ, дыр,
Шундыед но яркыт.
Ми дорын гинэ, дыр,
Омыред но чылкыт.
Гужемез сяськаос шулдырто,
Соос вылын мушъёс гужгето.
Бурдо куараос пелез урмыто,
Сюлэмме ик соос бугырто!
Пӧсь гужемез воштыса,
Сӥзьыл ке вуэ гурласа,
Мусо адӟисько гуртъёсмы,
Яркыт дӥсяське нюлэсмы.
Ворпо дӥсеныз воректӥз со.
Вите милемыз куное.
Я, дыртэ куды кутыса,
Губиё выжыкыл дуннее!
Пӧртмаськись толалтэ но
Ми палан туж шулдыр.
Нылпи куараос
Кылӥсько урам тыр.
Балтась музъеммы
Тулыслы шумпотэ.
Со ваньзэ сайкатэ,
Улӟытэ, ужатэ.
Бен, маин мон воштом
Яратон шаерме —
Вордӥськем Вукогуртме но
Ушма калыкме?
 
Екатерина Денисовна ИВАНОВА
Улын Ушма покчиёзо школаысь дышетӥсь


Будь в курсе последних событий! Читай tatmedia.ru


Фикереңне яз


Робот түгелдерсез бит?
Яңарту