2020 елда Россиядә 1 миллионнан артык кеше ана капиталы алачак, дип белдерә Татьяна Голикова

РФ Президенты Владимир Путин 2020 елның 1 гыйнварыннан «Демография» илкүләм проекты акчалары хисабына ана капиталы түли башларга йөкләмә бирде.

 «Демография» илкүләм проекты кысаларында ана капиталы түләү өчен 122 миллиард сумнан артык акча бүлеп биреләчәк. Бу хакта Sputnik радиосы РФ вице-премьеры Татьяна Голиковага сылтама белән хәбәр итә.

РФ вице-премьеры белдерүенчә, фаразларга караганда, 2020 елда  беренче сабый өчен – 558 меңгә якын, икенче бала өчен 551 меңгә якын кеше файдалана алачак.

Россия Президенты Владимир Путин Федераль Җыенга еллык Юлламасын гамәлгә ашыру буенча йөкләмәләр исемлеген раслаган иде. Аерым алганда, дәүләт башлыгы 2020 елның 1 гыйнварыннан беренче балалары туган гаиләләргә ана капиталы алу хокукын тәэмин итәргә кушты. Шул ук вакытта, әлеге акчаларның күләме 466,6 мең сум тәшкил итәргә, ә мондый гаиләләрдә икенче сабый дөньяга килгән очракта, аның күләме 150 мең сумга артырга тиеш.

Ана капиталы алудан тыш, 2020 елда Россиядә яшәүче 2,4 миллионга якын кеше 3 яшьтән 7 яшькә кадәрге балалар тәрбияләгән өчен пособие рәсмиләштерә алачак. Әлеге максатларга бюджеттан 159 миллиард сумга якын акча бүлеп бирү күздә тотыла, дип белдерде Голикова.