Чаңгы юллары Биктәштә дә салынган

Ул яктан биктәшлеләргә сокланырлык, бер кат эшләрен бетергәч, кичкырын, аякларга чаңгы эләбез дә, ә-ә-ә-нә андагы, басу уртасындагы агачка кадәр шуып, әйләнеп киләбез, диләр. Кичке караңгылык та куркытмый үзләрен, ялан кырда төлке, бүре мазар, кыргый этләргә юлыгырбыз дип тә шикләнмиләр. Һичьюгы сөйли торгач мифка әйләнгән чубакабрадан булса да шүрләрләр иде берәүләр. "Кемдер күршесе, кемдер дус кызы белән чаңгы шуа, Илдар абыйлар (Иванов) менә гаиләләре белән шул агачны әйләнеп кайта", ди авылның активисты, клуб мөдире Гөлира. Үзе дә чаңгы шуарга ярата. Ялгыз агач дигәннәре якын ара күренми, әмма шул араны матур көннәрдә бер булса да үтәргә тырышабыз, диләр. Эшкә дә, сәнгатькә дә өлгер халык сәламәт яшәү рәвешенә вакыт таба. Теләк кирәк тә, яшәүнең кадерен белергә генә кирәк.