Чутайда сөенечле хәл (фото)

Чутайда 1,5 км ераклыктагы иң саф сулы чишмә суын авылга китергәннәр.

«Чишмә янынан бер дә кеше өзелми, машина белән дә килүчеләр күп. Малмыж шәһәрендә яшәүче авылдашларыбыз да кайтып тәмле суыбызны алып китәләр. Суга килгән һәр кеше рәхмәт укый», дип хәбәр итә Чутайдан үз хәбәрчебез Гөлзифа Нәҗипова.

Шушы изге эшне башлаучы һәм иганәче Фердинад Нургаян улы Хәйруллинга, башкаручы авылдашларына зур рәхмәт белдерә чутайлылар.

Планнары зурдан: чишмә янына кечкенә тирән күл, тирә-ягына куак, агачлар утыртылып матурланачак икән. Калган эшләре май аенда тамамланып, ял итәрлек урын булачак, диләр. Әлегә кышын кар-буран күммәсен дип будка да китереп куйганнар.