Кешене Россия гражданлыгыннан нәрсә өчен мәхрүм итәргә мөмкиннәр?

Былтыр 656 мең кеше Россия гражданлыгын алган, ә шул ук вакытта 300гә якын кеше бу хокуктан мәхрүм ителгән. Кешене нинди очракта Россия гражданлыгыннан мәхрүм итәргә мөмкин икәнлеге "РФ гражданлыгы турында" законның 22 маддәсендә язылган:

• Гражданлыкны алганда ялган мәгълүматлар күрсәткән өчен;
• Россиягә ант бирүдән баш тарткан өчен;
• Россиянең берлегенә зыян китерү максатыннан гражданлык алган өчен (бу урын аңлатып язылмаган);
• Россия кануннарын үтәүдән баш тарткан өчен (бу урын да аңлатылмаган).

Россия гражданлыгы терроризм, экстремизм белән шөгыльләнүчеләргә, илгә куркыныч тудыручыларга бирелми диелгән. Шулай ук Россия хәрбиләренә каршы сугыш хәрәкәтләрендә катнашучылар, чит илләрнең хәрбиләре һәм эчке эшләр хезмәткәрләре, Россиядән депортацияләнгән кешеләргә гражданлык бирелми.

Кеше Россия гражданлыктан мәхрүм ителә икән, бу аның туганнарына, якыннарына кагылмый. Әйтик, ире ялган документлар белән паспорт алган икән, аның паспорты тартып алына, ә хатыны законлы алган икән, аның гражданлыгы мәхрүм ителми.

Чыганак: Интертат ; фото: pixabay.com