90 гына әле сиңа, мәктәбем!

90 гына әле сиңа, мәктәбем!

Яңгул урта мәктәбендә сыйныфташлар очрашуы кичәсе узды. Кемнәр генә мәктәбен сагынып кайтмаган! Әлеге чара, һич арттырусыз, район-республика чараларына тиң булды

Бер гасырга якын тарихы белән сирәк белем учак-лары горурлана аладыр. Районыбызның Яңгул урта мәктәбе – нәкъ менә шушы легендар мәктәпләрнең берсе. 22 февраль көнне авылыбызның урта мәктәбенә 90 ел, ә башлангыч мәктәп ачылуга 105 ел тулу уңаеннан тантаналы юбилей кичәсе уздырылды. 

Әлеге чара, һич арттырусыз, грандиоз узды, район-республика күләмендәге чараларга тиң булды дисәм, һич ялган булмас. Оештыру ягыннан да, масштабы, зурлыгы, түгелгән тир, куелган хезмәте белән үлчәгәндә дә искиткеч тамашага хозурланып китте чакырылган кунаклар. Кунаклар димәктән, мәктәпнең спорт залы шыгырым тулы иде ул көнне. Кем генә туган мәктәбен сагынып кайтмаган иде! Газиз мәктәп исә аларның һәммәсен дә үз баласыдай танып, сөенеп каршы алды. Зыялы шәхесләр, галимнәр, фән эшлеклеләре дисеңме, төрле дәрәҗәле урыннарда эшләүче җитәкчеләр, туган авылларында намус белән хезмәт куючылар, хәрбиләр, хезмәтләре белән төрле өлкәләрдә дан тоткан шәхесләр, атаклы спортчылар, шагыйрәләр – бу көнне алар һәммәсе дә мәктәпнең газиз балаларына – ак чәчүргечле кызлар, костюм-галстуклы малайларга әверелделәр дә калдылар. Күпме татлы сагыну, дулкынлану иде аларның күзләрендә. Кадерле мөгаллимнәре, белем биргән остазлары белән күрешү, аларны инде кечерәеп калган иңнәреннән сөеп кочу, кабат аларның сөйләмнәрен ишетә алу чыгарылыш укучыларының барысының да күңелләрен куптарды да куйды. Елмаймаган, хатирәләрен искә алып сөенмәгән бер кеше дә юк иде бу кичне.

Ямь өстенә ямь өстәп, чарага районыбыз аксакалы, шагыйрь, 1975-1977 елларда Яңгул урта мәктәбенең директоры булып эшләгән Гарифҗан ага Мөхәммәтшин, Почет билгесе иясе, хөрмәтле укытучы Мәсхүдә Хәлил кызы да килгәннәр иде. Әлеге аксакалларның, шулай ук башка бик күп ветеран укытучыларның нинди генә авыр шартларда булмасын, намус белән, балалар дип янып, фидакарьләрчә хезмәт куюы, укыту эшләрен оештырулары да кабат искә алынды. Аларның бәяләп бетергесез хезмәтен данлап, көчле алкышлар яңгырады.

Гомумән, чара барышында искә алынмаган вакыйга, шәхес тә юк иде. Башлангыч мәктәп оештырылганнан бирле һәр ел тарих күзлеге аша сурәтләнде, һәрбер чор хакында бәйнә-бәйнә сөйләнде, ә экранда хәтта бик элеккеге фотолар да аерым бер тере күргәзмә кебек күрсәтелеп барды. Әлеге чараны оештыручыларга бу галәмәт зур хезмәтләре өчен баш иеп, рәхмәт әйтергә генә кала.

Юбилей кичәсенә, әлбәттә инде, 50, 45, 40, 35, 30, 25 һәм 10 еллыкларына кадәр түгәрәк даталарын билгеләп үтүче чыгарылыш укучылары чакырылган иде. Алар һәммәсе дә сүз алып, остазларына рәхмәтләрен әйтеп, аларны чәчәк бәйләмнәре белән сөендереп, шулай ук мәктәпкә зур бүләкләр тапшырып уздылар.

Чараны алып баруга да зур игътибар бирелгән иде. Юбилей кичәсен, әлбәттә инде, Яңгул мәктәбен тәмамлаган укучылар – хәзерге көндә күренекле мәдәният эшлеклесе, шагыйрь Ренат Галиәскаров, шулай ук мәдәният өлкәсендә күп еллар эшләп килүче, танылган алып баручы Энҗе Мөхәрләмова (Сабирова) алып бардылар. Кичәне дәвам итеп, әлеге юлларның авторы мин дә чараны алып баруга өлеш керттем. Үзебезгә йөкләнгән җаваплы вазыйфаны башкарып чыгып, без өчебез Яңгул мәктәбе укытучылары һәм авыл халкы алдында да гүя янәдән имтихан тоттык. Без инде имтиханыбызны уңышлы дип тапканнардыр дигән өметтә калабыз.

...Мәктәп бинасына керә-керешкә һәр кунакны ашханәгә чакырып, тәмле коймак, кайнар чәй белән сыйлау, азактан кабат мул табыннар артына дәшеп, кунак итеп җибәрү дә бердән, оештыручыларның олы хезмәте нәтиҗәсе булса, икенчедән, мәктәпнең мондый чаралар уздыруга булган зур потенциалының күрсәткече. Мондый чараларны көчсез коллектив оештыра алмый. Бу урында Яңгул урта мәктәбе директоры Илнур Илфат улына һәм аның коллективына зур рәхмәт әйтеп китү лазем, чөнки көчле җитәкченең оешкан коллективы гына мондый чараларны наять итеп уздырырга сәләтле. 

Гаҗәп, кул да армый, каләм карасы да бетми бу мәкаләне язганда. Әллә сөекле мәктәбем хакында язгангамы, әллә үземнең дә инде ничә көн буе чарадан соң биләп алган рәхәт хисләрдә йөрүемнәнме, әллә инде өзелеп яраткан туган җиремне җирсенү-сагыну галәмәтеме – тәгаен генә билгеләргә дә авыр. Ни генә булса да, һич кенә дә бу зур чара, олуг юбилей хакында дәшми каласым, тын гына уздырасым һәм райондаш-авылдашларга да тын гына уздыртып җибәрәсем килмәде. Лаеклы мәктәп, лаеклы кешеләр хакында, әлбәттә инде, язмый, дәшми калу мөмкин түгел.

Сүземне йомгаклап, шуны языйм – калебне, йөрәкне чистарта торган мондый чараларга чакырулы булсагыз, берүк бармый кала күрмәгез. Күңелләрне очрашуларсыз нәүмиз итеп калдырмыйкчы, кадерле райондашлар!

Розалия Сафиуллина,
Яңгул – Казан